من مسيرة تجمع أهالي الشوف بأهالي عاليه في صوفر
إلى صوفر أتوا اليوم من الشوف وعاليه متحدين متضامنين ومتماسكين و”إيد وإيد للبنان جديد” تحت شعار ” الشوف ينتفض” و “كلّن يعني كلّن”.
“جينا اليوم لنطالب بحقوقنا ونوحد الجهود لنكسر حاجز الخوف وندعي الناس ليشاركونا بالمظاهرات السلمية والحضارية”.
إقرأ أيضاً: حشد من أبناء منطقة الشوف يطالبون بإسقاط النظام
” اليوم صرختنا عالية أكتر مع أهالي عاليه وصوفر ” تقول إحدى المتظاهرات من الشوف وتضيف” صوت الحق ما راح يموت وراح تتوحد الكلمة ونتوحد كلنا سوا لأن وحدتنا هيي اللي خلتنا ننزل ننتفض”
“لبنان بحاجة إلنا نكون صوت واحد ليرجع لبنان ويعمر “.
ويقول ابن عاليه” الشوف وعاليه واحد ويمكن التحركات خجولة بالنسبة للحضور بس الجبل من حقو ينتفض متل كل لبنان لهالسبب قررنا نُجمِّع حالنا سوا لتوصل الصورة للناس خاصة انو في تعتيم اعلامي وعم يرفضوا يصورونا بعض وسائل الاعلام لأن عدد الحضور قليل”
وتقول متظاهرة بحماسة” اليوم جينا من الشوف مجموعة مدنية لنتضامن مع أهلنا بصوفر وعاليه ولنثبت إنّو كل الساحات بتدعم بعضا ولنتكاتف ونقول” فليسقط هذا النظام الفاسد “.
المتظاهرون قالوا كلمتهم ل”اللواء”:
“أنا نازلة بصفة إنسانية وشخصية بعيداً عن كل الأحزاب والطوائف، نحنا كلنا نفس الشعور عم نعاني من نفس المأساة وندفع نفس الضرايب، ما حدا منا مرتاح او مبسوط لا لما تغرّبنا ولا لما رجعنا قدرنا نعيش مرتاحين ومتل ما بدنا”
إقرأ أيضاً: السيدة نجوى عزام: عشبة القمح علاج سريع للأمراض وأهمها السرطان
“كلنا بدنا طبابة وتعليم واستشفاء وشيخوخة والمرأة تعطي الجنسية لولادها، عنا كتير نهب وسرقة وأشخاص ما بتمثلنا، نحنا عم نغلط كل مرة ونرجع ننتخبهم بس هلق صار الوقت نقول كفى”
“التغيير يعني كلن من كبيرة لزغيرن وعنا كتير أصحاب كفاءات وكفوف نظيفة وناس بدها تخدم عنجد مش تسرق لجيوبها نحنا بدنا هيك أشخاص وصرخات صرخة كل مواطن ومواطنة من لبنان”.
هكذا كانت روح تظاهرة صوفر اليوم وتجدر الإشارة الى أن هذا التحرك جاء بعد إشكالين بين المعتصمين في بعقلين وعاليه خلال اليومين الماضيين وتم التعتيم عليهما بحسب ما قال بعض الموجودين اليوم في تظاهرة صوفر.
على خط متصل، يتوجه عدد كبير من الفنانين إلى مرج بعقلين عند الرابعة عصراً للمشاركة في تظاهرات الشوف دعماً للثورة والانتفاضة الشعبية.
وتقام غداً مسيرة سلمية من منشيّة دير القمر إلى ساحة دير القمر لرفع الصوت ودعم الثورة في لبنان.
المصدر:Alkalima online
